Ministri për Evropën dhe Punët e Jashtme Ditmir Bushati, ka folur lidhur dialogu me Greqinë dhe marrëveshjet e pritshme. Përpara një grupi studentesh ekselentë, Bushati është shprehur se dhurimi i 12 milje det Greqisë është një shpifje, dhe se koha do të vërtetojë të kundërtën. Ndërsa, duke iu përgjigjur Presidentit grek, i cili një ditë më parë është shprehur se çështja çame nuk ekziston, ministri është shprehur se nuk po flasim për të rishkruan historinë.
“Kemi një marrëveshje e cila u shfuqizua nga ana e Gjykatës Kushtetuese. Kjo do të jetë dhe pika e nisjes. Pika e dytë e konturit tonë që kemi ndërtuar strategjinë në bazë të legjislacionit tonë të brendshëm. Ne që në 2013 kemi bërë disa diskutime me palën greke. Hapësira detare është pjese e diskutimeve. Ne duam që të ndjekim me përpikëri vendimmarrjen e Gjykatës Kushtetuese. Ne do kemi një marrëveshje disa herë më të drejtë dhe me të favorshme se ajo e 2009. Nuk do të jetë thjeshte një marrëveshje në letër, por do të jetë dhe e zbatueshme. Çdo diskutim që ne i kemi shitur 12 milje, është thjeshtë një shpifje dhe se ligji do ta zbatojë. Ne do të kemi një marrëveshje të re dhe të favorshme”, tha Bushati.
Ndërsa, duke folur për çështjen çame, ministri Bushati është shprehur se “nuk është një çështje e karakterit territorial, sikundër thonë politikanët në Greqi”.
“Jemi përpjekur dhe Kryeministri Rama ka folur qartë lidhur me këtë çështje, si dhe ka qartësuar dhe palën greke. Në 2013, kjo çështje ka qenë e përfshirë si pjesë e dosjes sonë diplomatike. Për ne nuk është një çështje e karakterit territorial, sikundër thonë politikanët në Greqi. Por, kjo është një çështje e lirive dhe të drejtave themelore të njeriut. Nuk flasim, për një koncept të përgjegjësisë kolektive. Flasim për të drejtën e lëvizjes së lirë. Ne e dimë shumë mirë, ku qytetarë apo pjesë të komuniteti çam nuk lejohen për të hyrë normalisht në Greqi. Me qeverinë greke në këtë çështje jemi në një pozicion më të favorshëm se para disa vitesh”. TIRANA TODAY
