Tashmë që Britania e Madhe është larguar zyrtarisht nga Bashkimi Evropian, ajo ka hyrë menjëherë në një periudhë 11-mujore tranzicioni. Gjatë kësaj kohe, ajo do të vazhdojë t’ju bindet rregullave të BE-së, dhe të derdhë para në arkën e përbashkët të unionit. Shumica e gjërave do të qëndrojnë të njëjta. Por do të ketë edhe disa ndryshime, dhe ja cilat do të jenë ato:
Deputetët britanikë do humbin vendet e tyre në Parlamentin Evropian
Partia Brexit fitoi më shumë vende në zgjedhjet evropiane të majit 2019. Figura të njohura si Najxhëll Fariexh dhe Ana Uaidkomb, janë në mesin e 73 eurodeputetëve britanikë, që kanë humbur automatikisht vendet e tyre në Parlamentin Evropian.
Kjo pasi Londra ka lënë tanimë të gjitha institucionet politike të BE-së. Gjithsesi, përveç rregullave të BE-së gjatë periudhës së tranzicionit, Gjykata Evropiane e Drejtësisë do të vazhdojë të ketë fjalën e fundit mbi mosmarrëveshjet e ndryshme ligjore.
Për zyrtarët britanikë s’ka më samite të BE-së
Kryeministri britanik Boris Xhonson do të duhet të jetë i ftuar special, në rast se dëshiron t’u bashkohet liderëve të tjerë në samitet e Këshillit të BE-së në të ardhmen. As ministrat britanikë, nuk mund të marrin më pjesë në takimet e rregullta të BE-së.
Do të dëgjohet të flitet shumë mbi tregtinë
Tani Britania e Madhe do të jetë në gjendje të nisë bisedimet me vendet në mbarë botën, për vendosjen e rregullave të reja mbi tregtinë. Përkrahësit e Brexit, thonë se liria për të vendosur vetë mbi politikën tregtare, do të rrisë ndjeshëm ekonominë britanike. Prioritet kryesor do të jetë arritja e një marrëveshje tregtare Britani-BE, me të cilën ka dhe vëllimin më të madh tregtar.
Pasaportat britanike do të ndryshojnë ngjyrë
Londra do të rrikthejë pasaportat e saj ngjyrë blu, më shumë se 30 vjet pasi ato u zëvendësuan në modelin aktual në ngjyrë kuqerremtë. Pasaportat e reja, do nisin të lëshohen nga mesi i këtij viti. Por pasaportat ekzistuese, do të vazhdojnë të jenë të vlefshme.
Monedha Brexit
Mbi 3 milionë monedha 50 peni me shënimin Brexit, hynë në qarkullim që në datën 31 janar 2020. Monedha u prit me reagime të ndryshme, disa e mbështetën, të tjerë e refuzuan atë.
Mbyllet Departamenti Brexit në qeverinë britanike
Ekipi që u morr me negociatat me BE-në, është shpërbërë. Departamenti për Daljen nga Bashkimi Evropian, u krijua nga ish-kryeministrja Tereza Mej në vitin 2016. Për bisedimet e ardhshme, ekipi negociues britanik do të vendoset në 10 Downing Street.
Gjermania nuk do të ekstradojë qytetarët e saj në Britani
Kushtetuta gjermane nuk lejon ekstradimin e qytetarëve të saj jashtë vendit, përveç rastit kur bëhet fjalë për një vend tjetër të BE-së. Mbetet e paqartë, nëse të njëjtat kufizime do të zbatohen edhe në vendet e tjera anëtare të unionit. Komisioni Evropian ka refuzuar të komentojë mbi këtë çështje.
Po çfarë do të mbetet njëlloj, të paktën deri më 31 dhjetor 2020:
Udhëtimet pa viza
Udhëtimet e qytetarëve britanikë dhe të vendeve të tjera me avion, anije dhe trena, do të funksionojnë si zakonisht. Kur bëhet fjalë për kontrollin e pasaportave gjatë periudhës së tranzicionit, shtetasit britanikë do të lejohen të rreshtohen në zonat e rezervuara vetëm për vendet e BE-së.
Patentat e makinave
Për sa kohë që janë të vlefshme, ato do të vazhdojnë të pranohen pa problem nga autoritetet Brukseli dhe Londra.
Karta Evropiane e Sigurimeve Shëndetësore (EHIC)
Ajo i siguron shtetasve britanikë trajtim mjekësor të siguruar nga shteti, në rastin e sëmundjejeve ose aksidenteve. Ato mund të përdoren në çdo vend të BE (por edhe në Zvicër, Norvegji, Islandë dhe Lihtenshtajn). Dhe do të vazhdojnë të jenë të vlefshme gjatë periudhës së tranzicionit.
Të jetuarit dhe punuarit në BE
Liria e lëvizjes, do të jetë e garantuar edhe gjatë periudhës tranzitore. Ndaj britanikët do të jenë ende në gjendje të jetojnë dhe punojnë në BE. E njëjta gjë vlen për shtetasit e vendeve të BE-së, që duan të jetojnë dhe të punojnë në Britani.
Pensionet
Britanikët që jetojnë në BE, do të vazhdojnë të marrin pensionin e shtetit të tyre.
Kontributet buxhetore
Mbretëria e Bashkuar, do të vazhdojë të paguajë në buxhetin e BE-së gjatë periudhës kalimtare.
Tregtia
Gjatë kësaj kohe, tregtia Britani-BE do vazhdojë pa ndonjë tarifë shtesë apo kontrolle në dogana.
TIRANA TODAY
