Qyteti i Korçës u trondit mbrëmjen e djeshme nga disa të shtëna me breshëri, në drejtim të një banese, ku shënjestër e atentatit duket të ketë qenë Juxhin Kulla.
Kulla është një emër i njohur për policinë, pasi rezulton me precedentë penalë në fushën e narkotikëve. Ngjarja ndodhi mbrëmjen e djeshme rreth orës 22:00, teksa nuk raportohet të ketë pasur ndonjë të lënduar.
Disa orë pas ngjarjes tashmë, “BalkanWeb” ka mundur të sigurojë dëshminë e Juxhin Kullës dhe atë që ai ka parë natën e kaluar. Sipas tij, autorët kanë qëlluar me breshëri në drejtim të shtëpisë së tij dhe më pas janë larguar në drejtim të fshati Barç.
“Sapo dilja nga banesa në momentin që kam dëgjuar të shtënat. Dëgjova nja automjet që u largua me shpejtësi Në drejtim të fshatit Barç. Nuk pashë asgjë tjetër. Nuk kam probleme me askënd. Problemet e vetme që kam janë me policinë, prej ditës që unë jam dhunuar prej tyre. Është qëlluar disa herë drejt katit të dytë të banesës. Nuk kam konflikt me asnjë person . Këtë e them me siguri”, u shpreh ai.
Në lidhje me këtë ngjarje, policia ende nuk ka shoqëruar apo identifikuar asnjë person.
