Brenda qelive të sigurisë së lartë “41-bis” (video)

Regjimi i sigurisë “41-bis” në burgjet shqiptare do implementohet në Institucionin e Ekzekutimit të Vendimeve Penale 313, ose siç njihet ndryshe IEVP, “Jordan Misja”, si edhe në IEVP-në e Peqinit.

Agjencia Telegrafike Shqiptare pa nga afër ambientet ku të dënuarit apo të paraburgosurit që do t’i nënshtrohen këtij sistemi, do të qëndrojnë për të paktën 1 vit kalendarik.

Sistemi “41 bis”, që hyri në fuqi në fund të janarit të këtij viti, ende nuk ka njohur “banorët” tij për shkak se pritet të ngrihet Gjykata Speciale dhe Prokuroria Speciale (SPAK), pasi do të jetë pikërisht drejtuesi i këtij institucioni që do të bëjë kërkesën e arsyetuar dhe kjo kërkesë do të merret në shqyrtim nga Ministri i Drejtësisë, i cili do marrë vendimin final për këtë çështje, vendim që mund të ankimohet në Gjykatë nga i dënuari apo shtetasi në paraburgim.

Ky regjim sigurie implementohet për herë të parë në sistemin e burgjeve shqiptare dhe zhbën të ashtuquajturit VIP-a, kapo ose diskriminues pozitivë çfarë do të prodhojë në sistemin e burgjeve më shumë siguri dhe qetësi për të gjithë të dënuarit.

Ky regjim zbatohet për të dënuar dhe të paraburgosur që gjykohen dhe janë dënuar për vepra penale sipas neneve 79 , 230, 231, 232 , 234, 283, 284, 333, 334 çfarë i akuzon ata si grup i strukturuar kriminal, si banda e armatosur ose autorë e organizatorë të veprave me qëllime terroriste. Të gjithë të dënuarit e paraburgosur që përfshihen në këto nene të Kodit Penal mund të jenë pjesë e 41 BIZ. Të gjitha ata të dënuar dhe të paraburgosur që janë aktorë ose organizatorë të drejtpërdrejtë të cenimit të sigurisë dhe qetësisë do të jenë po ashtu, kontigjente për të qenë pjesë e këtij regjimi të posaçëm “Bis””.

Përmes këtij sistemi, të dënuarve nuk iu shkelet e drejta e tyre, por brenda këtij regjimi iu lind e drejta për të ankimuar këtë lloj dënimi. Gjykata do të japë mendimin e vet pas provave të paraqitura nëse do të vazhdojë ose jo i dënuari më tepër se një vit dënimin.

Ministria e Drejtësisë pasi të jetë bërë ankesë nga avokati dhe i dënuari merr vendim për vazhdimësinë ose jo të këtij vendimi të posaçëm. Pra afati kohor një vjeçar është i përcaktuar dhe askush para këtij afati nuk mund ta nxjerrë nga regjimi i mbikëqyrjes së posaçme.

Të izoluarve do t’u lejohet të kryejnë një takim në muaj me familjarët, në një mjedis të caktuar. Ndërsa ata që nuk do të kenë takime familjare, do t’u lejohet një bisedë telefonike në muaj, 10 minuta dhe e regjistruar. Ndërsa qëndrimi në ajrim në mjedise të hapura do t’u reduktohet deri në 2 orë, ku edhe do të monitorohen me kamera sigurie. /Burimi ATA