Kreu i Urgjencës Kombëtare, Skënder Brataj deklaroi se ende nuk ka një njoftim zyrtar në lidhje me praninë e variantit indian të koronavirusit, Delta, në vendin tonë. Deklarata e Bratajt u bë mbrëmjen e sotme në emisionin ”Çim Peka Live” në Syri Tv.
Brataj u shpreh se shenjat e variantit Delta janë pak të ngjashme me gripin, por theksoi se përhapet shumë më shpejt.
Ndër të tjera, Brataj tha se virusi po merr përmasa të mëdha dhe se më të prekurit aktualisht, janë personat nën moshën 30 vjeç.
Skënder Brataj: “Nuk ka njoftim zyrtar për variantin Delta. Shenjat e variantit Delta janë pak të ngjashme me gripin. Fakti negativ është se shpërndahet shumë shpejt. Madje, ka prekur më shumë moshat nën 30 vjeç. Çdokush që ka simptoma, duhet që të kërkojë ndihmë fillimisht tek mjeku i familjes. Virusi po merr përmasa tani. Nuk mund ta mohojmë faktin se mund të jetë prezent edhe në Shqipëri. Në vendin tonë ka pak raste, ndodh edhe sepse njerëzit gjejnë format e veta për të shëruar koronavirusin, sipas udhëzimeve që janë dhënë”.
