Në kohën kur infeksioni po përhapet me ritme të frikshme, numrat e të prekurve me Covid-19 do të vijojnë të rriten. Në një intervistë për A2 CNN, Shefi i Urgjencës Kombëtare, Skënder Brataj, pohoi se po diskutohen të gjitha masat që mund të merren për të shmangur mbylljen e plotë.
Ai ka një këshillë ndaj mjekëve të familjes, në lidhje me protokollin e mjekimit ndaj pacientëve me COVID. Brataj i mëshon fort faktit se jo të gjithë të prekurit, kanë nevojë për antibiotikë.
Skënder Brataj thotë se nëse gjendja rëndohet, vijon temperatura dhe kolla, atëherë mund të fillohet një antibiotik pas javës së parë.
“Format e lehta nuk duhet të jenë agresiv me të gjitha medikamentet. Në 4-5 ditët e para problemi kryesor është temperatura e cila kontrollohet me antipiretikë, me paracetamol, 2 deri 3 herë në ditë dhe sasia në varësi të peshës trupore.
Nëse gjendja rëndohet, vijon temperatura dhe kolla, atëherë mund të fillohet një antibiotik pas javës së parë. Ndërsa në ditën e 8-10, personat që kanë një ecuri më të keqe dhe që kanë vështirësi në frymëmarrje, mund të bëjnë një skaner për gjendjen e mushkërive dhe në këtë moment mund të vendoset në terapi kortizonike”.
Brataj këshillon të gjithë të prekurit e konfirmuar, veçanërisht ata që janë asimptomatikë, të respektojnë qëndrimin në shtëpi për të mos u bërë burim infeksioni për të tjerët.
