Brataj ngre alarmin: Pandemia po përhapet me shpejtësi jashtë Tiranës

Drejtori i Urgjencës Kombëtare, Skënder Brataj deklaroi se pandemia e Covid-19 tashmë po gjen përhapje edhe jashtë Tiranës.

I ftuar në emisionin Real Story, Brataj u shpreh se modeli i orarit të mbylljes ka funksionuar, ndaj dhe do të mbetet në fuqi.

Skënder Brataj: “Masat që kanë funksionuar deri tani kanë mbajtur nën kontroll infeksionin. Ka nisur vala e tretë në Europë, duke mos na përjashtuar as neve. Ka frekuencë të lartë të infeksionit anglez. Para dy javësh, kishim 105 qytete dhe fshatra, ku kemi bërë vizita vetëm për Covid.

Tani janë më shumë vendbanime, ku virusi ka prezencë, pra harta është zgjeruar. Pandemia po bën kërdinë jashtë Tirane. Këto janë arsye se pse modeli që ka dhënë rezultat, të vazhdohet”.

Komiteti Teknik i Ekspertëve vendosi që masat kufizuese të mos ndryshojnë edhe për dy javët në vijim, teksa ora policore do të mbetet 20:00-06:00.