Prej disa ditësh, Shqipëria ka nisur vaksinimin masiv të popullsisë kundër koronavirusit, teksa është përmirësuar edhe situata epidemiologjike.
Kreu i Urgjencës Kombëtare Skënder Brataj, deklaroi se janë garantuar mbi 50% e dozave që duhen, teksa shtoi se deri me tani është arritur 40% e imunizimit të tufës.
Në një intervistë për ”Report Tv”, Brataj tha se muajt e verës janë në disfavor të COVID dhe mund të ketë dobësim të tij me rritjen e temperaturave. Por, nuk mund të thuhet e njëjta gjë për stinën e vjeshtës.
Skënder Brataj: “Duke filluar nga java në javë mund të ketë lirim të mëtejshëm të masave. Janë disa masa. Të gjitha masat sidomos shkollat. U bë viti i 2, pothuajse skanë bërë leksion asnjë ditë. Ishin grupi që vinin për herë të parë. Nuk është tradicionale kjo mësimëdhënie. E dimë mirë që nga kinematë teatrot stadiumet, sjanë vetëm restoranti dhe bari që kërkojnë lehtësim. Në këtë moment që u liruan masat janë zgjedhjet dhe nuk mund të rrezikojmë më tej”.
“I nisem eksperiencës së vitit të kaluar u ulën rastet, sepse vera është në disfavor të virusit dhe në favorin tonë. Në verë dobësimi i virusit ndoshta dhe është një mundësi vaksinimi natyrale. Por duhet të rriten temperaturat. Por mos të harrojmë vjeshtën që do të thotë me uljen e temperaturave virusi është si njeriu do të mbijetojë dhe kam frikë mos na rikthehen mutacionet. Duhet të bashkëjetojmë me të s’mund të themi se jemi të çliruar”.
