Ish-deputeti i Partisë Socialiste, Spartak Braho, ka paralajmëruar gjakderdhje gjatë protestës së thirrur nga ish-kryeministri Sali Berisha dhe mbështetësit e tij. Duke folur në “Top News”, ish-deputeti socialist ka folur haptazi, e madje ka paralajmëruar se në tubimin e thirrur sot nga Berisha para selisë blu, do të ketë dhunë. Ai ka shkuar edhe më tej, duke bërë të ditur se sipas informacioneve që ka, do të vritet një deputet i Partisë Demokratike, ndërkohë që ka nxjerrë edhe inicialet e ligjvënësit demokrat që mund të eliminohet në protestën e sotme.
“Mos keni asnjë iluzion që nuk do të ketë dhunë, ka ardhur nga dhuna, ka jetuar me dhunën, e do ta mbyllë se ku e di ai, po përsëri me dhunë. Është dhuna e ushtruar mbi të përndjekurit politik, në zgjedhjet ’96, grushti shtetit ’98, e ky njeri është mësuar me dhunën. Unë kam thënë se PD është deshtament i lindur nga dhuna, ka taborrin e vet të dhunës, është ushqyer nga teoria e Berishës se me anë të dhunës mund të arrihet gjithçka”, tha Braho.
Ish-deputeti socialist foli për skenare vrasje, që mund të përfshijnë edhe një deputet, ndërsa dha inicialet e deputetit që mund të jetë viktimë.
“Mos të keni iluzion se nuk do të ketë dhunë. Do të ketë nga këta që edhe nuk përmbahen, nga të dhënat që kam unë mund të ketë edhe vrasje. Një personalitet, deputet, me inicialet…, rrezikon të vritet nesër. Berisha nuk bën dot pa gjak. E.A të ruhet, këtë këshill i jap; të ruhet nesër. Janë situata që dalin nga kontrolli, që dalin nga jashtë. Një shenjë duhet e dalin jashtë, edhe ai nuk e ka problem se e thotë si me Azem Hajdarin që nuk e vrava unë, por Izet Haxhia”, tha ai.
Braho paralajmëroi deputetin që të ruajë krahët. “Mos kenë iluzione, ore do të ketë dhunë, ata që do të rrethojnë Sali Berishën nuk mbahen, do të ketë dhunë. Nuk mbahen ata, i ka karikuar njerëzit, në këtë kontekst unë parashikoj që do të ketë viktima. Nga burimet e mia unë parashikoj që një E.A., do të ketë një goditje pas shpine”, theksoi Braho.
Protesta e Berishës/ Ambasada e SHBA thirrje qytetarëve të saj: Qëndroni larg selisë së PD-së!
Ambasada e Shteteve të Bashkuar të Amerikës në Tiranë, iu ka bërë thirrje qytetarëve amerikanë që të tregohen të kujdesshëm, për shkak të protestës që ka paralajmëruar ish-kryeministri Sali Berisha. Përmes një njoftimi zyrtar, Ambasada e SHBA-së këshillon qytetarët e saj në Tiranë që të shmangin çdo tubim në qytet, si edhe zonën ku pritet të zhvillohet protesta, rreth selisë së Partisë Demokratike, pasi siç thekson ajo, mund të ndodhin situata të paparashikueshme, ndërkohë që kërkon prej shtetasve amerikane që të monitorojnë mediat dhe autoritet lokale për më shumë detaje.
Situata në PD është shumë e tensionuar, ku në datën 5 Lulzim Bashës i ka mbaruar ultimatumi i vendosur nga Sali Berisha për të liruar zyrën e PD-së, ndërkohë që ish-kryeministri ka thirrur sot një protestë që do të nisë në orën 12:00, ndërsa protestuesit do të mblidhen në selinë e PD-së. Pavarësisht deklaratave të Berishës se protesta do të jetë paqësore, PD-ja ka marrë masa duke përforcuar hyrjen në selinë blu, për të qenë e përgatitur për çdo skenar, ndërsa Basha madje ka deklaruar se do të jetë në zyrë për të vijuar punën si normalisht.
