Paraditen e sotme, mjekët dhe infermierët do të dalin në një protestë, ku ndër të tjera ata duan rritje të vlerësueshme të trajtimit financiar si dhe të bëhet sigurimi i jetës së personelit shëndetësor.
Në orën 10:00, bluzat e bardha do të zhvillojnë një protestë në oborrin e Qendrës Spitalore Universitare “Nënë Tereza”. Pavarësisht kërkesës së parashtruar tek Policia e Shtetit, atyre u është mohuar. Kjo pasi nuk lejohen grumbullimet, për shkak të situatës me koronavirus.
Lidhur me këtë protestë, një reagim i menjëhershëm ka ardhur nga ana e kryeministrit Rama. Kreu i qeverisë ka ftuar mjekët që të zhvillojnë një takim sot, një orë para protestës. Nuk dihet ende nëse mjekët do të marrin pjesë në takimin me të.
Kërkesat e mjekëve dhe infermierëve:
-Të shpallen dëshmorë të kombit të gjithë ata pjesëtarë të personelit shëndetësor, të cilët humbin jetën në këtë luftë me këtë armik të padukshëm.
-Të bëhet sigurimi i jetës së personelit shëndetësor, me qëllim që familjet e tyre të mund të vazhdojnë jetën edhe pas fatkeqësive të mundshme në këtë luftë.
-Rritje të vlerësueshme e trajtimit financiar të personelit shëndetësor.
-Personeli shëndetësor të çdo niveli t’i sigurohen të gjitha kushtet optimale në punë, për parandalimin e infeksionit sipas të gjitha standardeve kombëtare dhe ndërkombëtare.
