Ministria e Brendshme ka reaguar në lidhje me sulmin kibernetik në sistemin e kontrollit të hyrje-daljeve në kufi, i njohur si TIMS. Në reagimin zyrtar thuhet se ekspertët tanë bashkë me ata të vendeve tona partnere, kanë punuar intensivisht prej momentit të parë kur është hasur sulmi. Për efekt sigurie sistemet tona, përfshi atë TIMS, kanë qëndruar përkohësisht të mbyllura derisa rreziku të shmangej plotësisht. Po kështu sqarohet se shumë shpejt sistemi TIMS do të rikthehet në punë.
Reagim i Ministrisë së Brendshme:
Mbrëmjen e kaluar sistemet e ruajtjes dhe transmetimit të të dhënave në Policinë e Shtetit janë gjendur nën një sulm kibernetik të ngjashëm me atë që pësoi e-Albania në muajin korrik.
Nga të dhënat paraprake rezulton që sulmi të jetë kryer nga e njëjta dorë.
Ekspertët tanë bashkë me ata të vendeve tona partnere kanë punuar intensivisht prej momentit të parë kur është detektuar sulmi, për të garantuar së pari pacënueshmërinë e të dhënave dhe më pas neutralizimin e këtij akti kriminal.
Për efekt sigurie sistemet tona, përfshi atë TIMS, kanë qëndruar përkohësisht të mbyllura derisa rreziku të shmangej plotësisht.
Shumë shpejt sistemi TIMS do të rikthehet në punë.
Maksimalisht të vendosur, bashkë me aleatët tanë, vazhdojmë punën për të bërë gjithçka duhet që sistemet tona digjitale të jenë të sigurta dhe shërbimi ndaj qytetarëve të mos ndërpritet në asnjë rast.
Prej mbrëmjes së të premtes, sistemi TIMS në Kapshticë është bllokuar duke krijuar radhë gjatë momenteve të para. Për shkak të defektit në sistem, përpunimi i të dhënave për hyrjet dhe daljet e shtetasve bëhet manualisht dhe të dhënat shënohen në regjistër. Edhe në pikën e kalimit kufitar të Kakavijes ka patur probleme me sistemin TIMS, duke bërë gjithashtu që edhe këtu kalimi i qytetarëve të mbahet përmes regjistrave.
