Pas shkelmimit të derës në seli gjatë hyrjes së Berishës, PD-ja është “blinduar”. Një ditë pasi anëtarë të Komisionit të Rithemelimit te PD-së, të udhëhequr nga Sali Berisha shqyen me forcë derën e sallës së mbledhjeve në selinë demokratike, në selinë blu janë marrë masat. Në ambientet e jashtme të godinës është vënë re shtimi i kamerave të sigurisë. Dje, ish-kryeministri Sali Berisha kërcënoi Lulzim Bashën dhe madje i kërkoi të reflektojë e të “dorëzohet” pa kushte.
I riu që theu derën u identifikua dhe denoncua edhe nga vetë Partia Demokratike, e cila përmes disa deklaratave për media bëri me dije se ai është një person me precedent kriminal, ndërsa i bëri thirrje organeve ligjzbatuese ta arrestojnë atë. “Sipas Ministrisë së Brendshme dhe Agjencisë Kombëtare të Krimit në Britaninë e Madhe, shtetasi F. Dauti është cilësuar person i aftë për dhunë ekstreme, dhe një anëtar me ndikim në një rrjet kriminal shqiptar me qendër në Londër i përfshirë në importimin e kokainës”, tha PD.
