Pas arrestimit të Astrit Thaçit si i dyshuari kryesor i grabitjes në Elbasan, policia ka vijuar më tej hetimet për personat të tjerë që mund të kenë bashkëpunuar me të.
Në sajë të një njoftimi për mediat, policia ka bërë me dije se në kuadër të këtij operacioni sot është arrestuar edhe një 26 vjeçar në Tiranë, i cili dyshohet se është përfituesi i disa prej sendeve të vjedhura. Mësohet se ai ka blerë katër byzylykë floriri, të cilat Thaçi i kishte grabitur në argjendarinë në Elbasan.
NJOFTIMI
Në vijim të operacionit “Trajektorja” nga DVP Durrës, Tiranë, Elbasan dhe Forca e Posaçme Operacionale në Departamentin e Policisë Kriminale, në kuadër të të cilit u bë e mundur kapja dhe ndalimi i autorit të një sërë vjedhjesh dhe tentativash për vjedhje me dhunë e armë, si dhe prangosja e bashkëpunëtores së tij në këto vjedhje, ka vijuar puna për dokumentimin e plotë të këtyre rasteve.
Në këtë kuadër, specialistët për Hetimin e Krimit në Komisariatin e Policisë Elbasan arrestuan shtetasin: F. S., 26 vjeç, banues në Tiranë, pasi ka blerë 4 byzylykë floriri nga shtetasi A. Th., të cilët i kishte vjedhur.
Materialet hetimore i kaluan Prokurorisë pranë Gjykatës së Shkallës së Parë Elbasan, për veprat penale “Përvetësimi i parave ose i mallrave që rrjedhin nga vepra penale ose veprimtaria kriminale” dhe “Fshehja e të ardhurave”.
