Kryeinspektori i Përgjithshëm, Shkëlqim Hajdari ka folur në lidhje me nisjen e punës së Byrosë Kombëtare të Hetimit.
I ftuar në emisionin “Arena” në Ora News, Hajdari tha se ky institucion pritet që të nisë punën në fund të shkurtit. Ndërsa theksoi se rezultatet do të bëhen të dukshme disa muaj më pas.
Kjo sipas tij, pasi dosjet duhen analizuar në detaje për të parë se cila prej tyre është pezulluar në kundërshtim me ligjin.
“Byroja Kombëtare e Hetimit, BKH, me të gjithë llogaritë që bëj është e ndërtuar, rezultatet për “peshqit” nuk duhet të presim as në shkurt, as në mars, as në prill. Këto njerëz do të studiojnë dosjet, do të analizohen, kush janë ato dosje që janë pezulluar në kundërshtim me ligjin, dhe arsyeja e pezullimit”, tha ai.
