Italia shënoi dje ditën më të mirë që nga shpërthimi i pandemisë së koronavirusit, duke shënuar më pak se 100 viktima.
Por numri i viktimave në 24 orët e fundit është rritur. Sipas mediave italiane, sot janë shënuar 162 viktima nga COVID-19. Kështu shkon në 32.169 numri total i personave që kanë humbur jetën nga koronavirusi në vendin fqinj.
Gjatë 24 orëve të fundit janë shënuar 813 raste të reja infektimi, duke e çuar në 226.699 numrin total të rasteve të konfirmuara.
Aktualisht në të gjithë vendin janë 65.129 raste ende aktive me COVID-19. Nga këta, 9.991 të persona janë shtruar në spitale, ndërsa 716 prej tyre ndodhen në terapi intensive.
Lombardia mbetet rajoni më i goditur nga koronavirusi në Itali. Në 24 orët e fundit kanë ndërruar jetë 54 persona, duke shkuar në 15.597 numri i viktimave vetëm në rajonin e Lombardisë.
Deri më tani, rreth 130 mijë persona të infektuar janë shëruar në vendin fqinj.
Rreth 5 milionë njerëz nga e gjithë bota janë prekur nga koronavirusi, ndërsa mbi 322 mijë njerëz kanë humbur jetën.
