Prej më shumë se 3 ditësh, SHBA po regjistron më shumë se 1 mijë viktima në bilancin e 24 orëve.
Sipas universitetit John Hopkins, në 24 orët e fundit në SHBA kanë humbur jetën 1,150 persona, duke e çuar në 10,783 numrin total të viktimave.
Më shumë se 367 mijë persona janë prekur nga koronavirusi në SHBA, ndërsa 19,810 prej tyre janë shëruar.
“Do të dalim nga kjo krizë me më shumë forcë, unitet dhe vendosmëri”, tha Trump, gjatë konferencës së përditshme të shtypit për koronavirusin, duke lënë të ditur se SHBA do të rihapet më shpejt nga sa njerëzit mund ta mendojnë.
Sipas presidentit Trump, në SHBA janë bërë më shumë se 1,790,000 teste për koronavirusin.
“Kur bën teste ke edhe raste, përndryshe nuk do të dije asgjë nëse ka të infektuar. Njerëzit qëndrojnë në shtëpi dhe ti nuk di asgjë. Por ne kemi bërë 1,790,000 teste në të gjithë vendin. Më shumë se çdo vend tjetër në botë. Ndaj ne kemi edhe më shumë raste”, tha ai.
Statistikat e nxjerra tregojnë se në Chicago, koronavirusi po rëndon më shumë mbi amerikanët me ngjyrë.
Banorët me ngjyrë të Chicago përbëjnë gjysmën e të gjitha rasteve të koronavirusit në qytet dhe më shumë se 70 për qind të numrit të viktimave. Pavarësisht se janë rreth 30 për qind e popullatës së qytetit.
Në Michigan, afro amerikanët përbëjnë 14 për qind të popullatës, por numërojnë 33 për qind të rasteve të koronavirusit dhe 41 për qind të viktimave. Ndërsa të bardhët, zënë 23 për qind të rasteve në Michigan dhe 28 për qind të viktimave.
