Ambasada e SHBA-së ka reaguar pas urdhrit të presidentit amerikan Joe Biden, ku kërkon përfshirjen e Shqipërisë në listën e vendeve për bllokimin e pasurive të individëve, të cilët kanë cënuar stabilitetin në Ballkanin Perëndimor. Sipas Ambasadës, ky urdhër është një mjet jetik drejt arritjes së këtij qëllimi të përbashkët.
Në reagimin e postuar në faqen zyrtare në Facebook, thuhet se një referencë e tillë për Shqipërinë bën të qartë se Urdhri Ekzekutiv është në përputhje me punën që SHBA dhe BE kanë bërë për të integruar rajonin në strukturat Evropiane dhe Euro-Atlantike. Presidenti i SHBA, Joe Biden ka nxjerrë një urdhër të ri ekzekutiv që përfshin edhe Shqipërinë, urdhër në të cilin parashikon bllokim prone dhe ndalim të hyrjes në SHBA, të personave që kontribuojnë në destabilizimin e Ballkanit Perëndimor.
Në letrën drejtuar Kongresit dhe Senatit, presidenti Biden informon se këta persona që konsiderohen si një kërcënim për sigurinë kombëtare dhe politikën e jashtme të Shteteve të Bashkuara, do ju sekuestrohet prona dhe ndalohet hyrja në SHBA.
Njoftimi
Presidenti Joe Biden miratoi një Urdhër Ekzekutiv (E.O.) të ri dje, i cili autorizon përdorimin e sanksioneve kundër personave të përfshirë në një sërë aktivitetesh destabilizuese në Ballkanin Perëndimor, përfshirë personat e angazhuar në përpjekje që kërcënojnë paqen, sigurinë dhe stabilitetin rajonal; cënojnë proceset demokratike; dhe përfshihen në korrupsion në lidhje me rajonin ndër aktivitete të tjera. Një referencë e qartë për Shqipërinë bën të qartë se Urdhri Ekzekutiv është në përputhje me punën që Shtetet e Bashkuara dhe Bashkimi Europian kanë bërë për të integruar rajonin në strukturat Europiane dhe Euro-Atlantike. Urdhëri Ekzekutiv i djeshëm është një mjet jetik drejt arritjes së këtij qëllimi të përbashkët. Lexojeni Urdhërin e plotë duke klikuar mëposhtë.
