Partia Socialiste ka përgatitur një paketë ndryshimesh ligjore për të shmangur përfundimisht përplasjet për betimin para presidentit të anëtarëve të Gjykatës Kushtetuese.
Këto ndryshime vijnë pas përplasjeve të forta të Kuvendit dhe presidentit Meta, për ligjshmërinë e betimeve. Kujtojmë që Arta Vorpsi u betua përpara noteres si anëtare e GJK, pasi presidenti Meta nuk e ftoi në ceremoninë e betimit.
Sipas ndryshimeve të propozuara nga PS-ja, Presidenti i vihet një afat prej 10 ditësh që të ftojë për betim anëtarët e Gjykatës Kushtetuese. Nëse kjo nuk ndodh, betimi do të bëhet me shkrim në organe të tjera ligjore dhe do t’i dërgohet presidenti me shkrim. (Precedenti që mund të standardizohet, betimi përpara noterit).
Sipas këtij propozimi, betimi do të quhet i vlefshëm dhe gjyqtari fillon automatikisht punën. Në kuadrin e luftës politike, kjo është një mënyrë për të shmangur përplasje ndërmjet presidentit dhe qeverisë në të ardhmen.
Ndryshimi i propozuar
Në nenin 8, paragrafi 1, shtohet fjalia e dytë me këtë përmbajtje:
Presidenti i Republikës organizon ceremoninë e betimit jo më vonë se 10 ditë nga data e zgjedhjes, emërimit ose shpalljes të emëruar të anëtarit të Gjykatës Kushtetuese.
Nëse anëtari i Gjykatës Kushtetuese nuk thirret për të bërë betimin, pas përfundimit të këtij afati, ai kryen betimin në formë të shkruar dhe ia dërgon atë Presidentit të Republikës, organit të emërtesës dhe Gjykatës Kushtetuese.
Data e organizimit të ceremonisë së betimit ose data e dërgimit të betimit me shkrim, konsiderohet si dita e betimit dhe e fillimit të detyrës së gjyqtarit të Gjykatës Kushtetuese dhe përfshihet në dosjen e tij personale.
Në rast se gjyqtari nuk pranon të bëjë betimin, mandati i tij përfundon.
