Kryetarja e LSI, Monika Kryemadhi, ka komentuar gjatë një interviste në “Report TV” vendimin e GJKKO-së për dënimin e ish-ministrit të Brendshëm, Saimir Tahiri. Teksa e cilësoi vendimin për Saimir Tahirin një drejtësi të vonuar, ajo tha se denoncimet e para për të kanë ndodhur së paku që në 2016.
Kryemadhi solli në vëmendje Konventën e LSI-së së Tiranës ku ajo vetë, edhe pse në bashkëqeverisje me Partinë Socialiste, paralajmëroi se ‘kur pikturave të bukura t’u dalë boja, do të shohim fushat e kanabisit’.
“Sot kemi një drejtësi të vonuar, por më tepër sesa dënimi për Saimir Tahirin, ajo që ka rëndësi për publikun është urdhëruesi i Saimir Tahirit, shefi i tij Edi Rama.
Që të jem e sinqertë, s’më vjen mirë që të shoh asnjë shqiptar në burg. Ne nuk duhet të ndjejmë kënaqësi kur qeveritarët futen në burg, por kur të shohim sesi sistemi nuk i lejon politikanët të jenë arrogantë. Të mos harrojmë se z. Tahiri ka qenë ministri më jetëgjatë në tranzicion”, tha Kryemadhi.
