Vendet e Ballkanit Perëndimor duhet të përmirësojnë atë që njihet si ndërlidhje e fortë, pra linjat e transportit dhe forcimin e sistemeve ligjore në mënyrë që të tërheqin më shumë investitorë dhe investime të huaja, deklaroi zëvendëspresidenti i Bankës Europiane për Rindërtim dhe Zhvillim, i pranishëm në panelin për Ballkanin Perëndimor, pjesë e forumit strategjik të Bledit në Slloveni.
Pierre Heilbronn në një intervistë për Reuters shtoi se, banka do të vijojë të investojë rreth 1 miliardë euro çdo vit në rajonin që përfshin Shqipërinë, Kosovën, Serbinë, Maqedoninë, Malin e Zi dhe Bosnje Hercegovinën. Ai shtoi se, vendet e rajonit duhet të kenë si prioritet zhbërjen e barrierave mes tyre, shkruan Scan.
Ndër të tjera, ai shprehu interesin e bankës për investime kryesisht në fushën e energjisë së rinovueshme dhe eficencën energjetike.
Një tjetër lajm i mirë që prodhoi forumi i Bledit është edhe përfshirja e Bosnje Hercegovinën në traktatin e transportit. Heilbronn deklaroi gjithashtu se, rreziku më i madh për rajonin buron nga tensionet politike mes tyre.
