Sali Berisha, sot në një konferencë për mediat ka konfirmuar se do të vazhdojnë protestat kundër qeverisë. Ai nuk dha një afat kohor se kur do të nisin, në verë apo vjeshtë, por do të ketë një strategji të caktuar. “Misioni do vazhdojë me një projekt të caktuar. Nuk mund të them se do jetë vera apo vjeshta, por ai do vazhdojë në format e tij gjersa në fund do kalojë qytetarët në shesh të gjejnë realizmin e qëllimit të tyre”, tha Berisha.
Sipas tij, qytetarët që morën pjesë në protestë nuk ishin për të, por ishin misionarë për të rrëzuar qeverinë e Ramës.
“Për pjesëmarrjen e tyre si misionarë të vërtetë në protestën 7 korrikut, përmasat e saj në frymën e mesazhin, tejkalon në këto 30 vite çdo protestë tjetër. Mbrëmë, në Bulevardin Dëshmorët e Kombit, të gjithë ata që erdhën nga çdo skaj e lagje e Tiranës dhe Shqipërisë, nuk ishin aty për Sali Berishën.
Ata ishin misionarë burra, gra e të rinj në përmbushje të një misioni. Është nukleare, jo e jashtëzakonshme. Dalin në kulmin e vapës, në korrik ata dolën se i thërriste vendi i tyre, dheu i tyre për shpëtim. Pra data 7, do të shënohet në memorien e kohës dhe revolucionit si një datë historike në të cilën shqiptarët befasuan Tiranën dhe botën”.
Ndër të tjera, Berisha nuk ka lënë pa komentuar faktin që iu bashuan edhe deputetët kritikë. Ai tha se janë të mirëpritur në Partinë Demokratike.
“Kanë përmbushur një detyrim moral dhe ligjor. Janë deputetë të PD-së dhe janë gjetur mes zgjedhësve, mbështetësve aty ku duhet të ishin. Unë i përgëzoj. E kam deklaruar që protesta i mirëpret, i kemi ftuar. Janë deputetë të PD-së, nuk injoroj problemet që ekzistojnë. Ata që vijnë në PD e parë, dinë të marrin vendimet e duhura”, tha Berisha.
Tubimi i djeshëm nisi rreth orës 19:00. Berisha marshoi në këmbë nga selia blu drejt Kryeministrisë, aty ku ishte vendosur edhe podiumi. Protesta ishte paqësore dhe pa incidente, ku e gjitha ishte përqendruar te fjalimet. Në krah të Berishës u pa edhe kryetarja e LSI-së, Monika Kryemadhi, por edhe një grup deputetësh që deri “dje” ishin kritikë të Berishës.
