Kryeministri Rama, deputetët e PS dhe ministrat kanë zhvilluar homazhe në kujtim të 4 viktimave të protestës së 21 janarit 2011. Të shoqëruar nga familjarë të viktimave, ata kanë vendosur karafila të kuq në vendet ku u qëlluan protestuesit në bulevardin “Dëshmorët e Kombit”.
Në protestën që përfshiu vendin më 21 janar, mbetën të vrarë 4 qytetarë, më konkretisht Aleks Nika, Ziver Veizi, Hekuran Deda dhe Faik Myrtaj.
Asokohe në qeveri ishte Partia Demokratike, ndërkohë që Partia Socialiste ishte në opozitë. Protesta degjeneroi në dhunë, dhe djegie, mes të cilës Garda e Republikës hapi zjarr ndaj protestuesve.
Kryetari i grupit parlamentar të PS, Taulant Balla, thotë se Sali Berisha urdhëroi të qëllohet mbi protestuesit e 21 janarit të vitit 2011.
Statusi
KURRË NUK DO HARROJMË!
Më 21 janar 2011 Sali Berisha urdhëroi të qëllohet me plumba mbi popullin që kishte dalë në protestën më të madhe kundër regjimit të tij korruptiv, duke u marrë jetën katër shqiptarëve të pafajshëm e plagosur dhjetra të tjerë.
Sali Berisha e ka pranuar botërisht se ai ka qenë urdhëruesi. Kemi depozituar kallzim penal pas ngjarjes me prova dhe fakte ndaj zinxhirit komandues të vrasjeve më 21 Janar, kupola e të cilëve nuk u morën kurrë të pandehur.
Hezitimi 11 vjeçar i prokurorisë për të marrë si fillim në pyetje dhe më pas nën akuzë atë që dha urdhërin të qëllohet mbi popullin, është turpi i drejtësisë. Për fat të keq edhe i drejtësisë së re, e cila po luan ping-pongun e vjetër me dosjen sipas tyre ende pa autor të dëshmorit Aleks Nika. Urdhëruesi është Sali Berisha!
