Dje Berisha doli hapur kundër SHBA-së, duke vënë theksin tek kandidatura për postin e kryetarit të Partisë Demokratike, ndonëse është shpallur “non grata”. Lideri i koalicionit “Shtëpia e Lirisë” shigjetoi ambasadoren amerikane, Yuri Kim, duke e akuzuar se u angazhua në fushatën e fundit zgjedhore të 6 Marsit kundër tij.
Dje në një deklaratë për mediat, Berisha tha se rikthimi i tij i fuqishëm në politikë u konfirmua nga elektorati në zgjedhjet e pjesshme lokale të së dielës, ku koalicioni “Shtëpia e Lirisë” siguroi 31% të votave dhe fitoi Shkodrën.
“Zonja guvernatore i lejoi vetes të ndërhyjë në fushatë kundër Sali Berishës. Doja t’u thoja zgjedhësve ja ‘unë jam Sali Berisha’. Është jashtë çdo lloj imagjinate që unë do të devijoj nga ky kurs, nga vendimi im i shpallur para demokratëve që do të garoj për kryetar të PD-së.
6 Marsi faktoi një të vërtetë, ajo e vërtetë është rikthimi i Sali Berishës, rikthim me një mbështetje 31% të elektoratit shqiptar”, tha Berisha.
Ndër të tjera, ish-kryeministri Berisha konfirmoi se nuk do të krijojë forcë të re politike, duke pranuar se do të ketë vetëm një opozitë të vërtetë. Për propozimet për pajtim dhe bashkim mes demokratëve, ish-kryeministri u shpreh se mirëpret çdo propozim. “Jam i gatshëm për çdo propozim që vendos në epiqendër votën e lirë të demokratëve. Nuk do të ketë parti të re, kjo është opozita e vërtetë”, vijoi më tej ish-kryeministri, Sali Berisha.
