Ish-kryeministri Sali Berisha, vendosi të padisë në Gjykatën korreksionale të Parisit, Sekratarin amerikan të Shtetit, Antony Blinken, pas vendimit të DASH, që e shpalli ”non grata”, atë dhe familjen e tij. Në këtë çështje, Berisha do të përfaqësohet nga avokati i njohur në Francë, Jean-Yves Le Borgne.
Por, a mund ta marrë përsipër gjykata në Francë këtë padi? Juristi dhe avokati francez, Maître Claude Benjamin Mizrah duke folur për ”Top Channel”, ka treguar se në cilat kushte Berisha mund të bëjë padinë kundër Blinken.
Sipas tij, Berisha duhet të jetë rezident në Francë, ose ka një rezidencë në këtë shtet. Gjithashtu, nëse Berisha e ka marrë informacionin për shpalljen ”non grata”, gjatë kohës kur ka qenë në territoren francez, mjafton për të mbështetur kompetencën e Gjykatës korreksionale të Parisit.
Ai u shpreh se këto elemente do i lejonin krejt ligjërisht Berishës të padiste sekretarin amerikan pranë gjykatave franceze.
Maître Claude Benjamin Mizrahi: ”Jam pyetur sot për një padi që është bërë nga Zoti Berisha, ish president dhe kryeministër i Shqipërisë kundrejt sekretarit amerikan në kushtet kur ky i fundit e ka deklaruar z Berisha dhe familjen e tij person “non -grata” në SHBA si pasojë e ngjarjeve të ndodhura vite më parë. Ajo që kuptoj tjetër është se padia është ngritur për shpifje, ç’ka më duket logjike pas informacioneve që kam marrë. Por theksoj se gjithë çfarë po them është hipotetike pasi nuk e kam dosjen në zotërim. Në këto rrethana, më pyesin për arsyen dhe faktin pse padia është bërë në Gjykatën korreksionale të Parisit.
Shpjegimet e para qe mund të jap janë :ose zoti Berisha është rezident francez apo ka një rezidencë franceze që do i lejonte të kërkonte mbrojtjen e juridiksioneve franceze ose, dhe ajo që më duket më logjike në kushtet që jemi, është se në këtë rast, deklarata e sekretarit amerikan është bërë në rrjetet sociale dhe mjafton që informacioni të merret apo që zoti Berisha të jetë njoftuar për lajmin brenda territorit francez gjë që mund te provohet dhe ka mjafton për të mbështetur kompetencën e Gjykatës korreksionale të Parisit. Këto elemente do i lejonin krejt ligjërisht zotit Berisha të padiste sekretarin amerikan pranë gjykatave franceze. Sigurisht, duke mbajtur gjithë rezervat e nevojshme pasi dosja nuk është në zotërimin tim.”
