Ish-prokurori Shkëlqim Hajdari, ka komentuar vendimin e Departamentit Amerikan të Shtetit (DASH), për të shpallur ”non grata’’, ish-kryeminsitrin Sali Berisha dhe familjen e tij.
I ftuar në emisionin ”Arena”, Hajdari e ka cilësuar vendimin e DASH si një ngjarje historike, teksa shtoi se SHBA-të disponojnë provat që Berisha është përfshirë në afera korruptive.
Hajdari u shpreh se DASH do i sjellë këto prova në Shqipëri, nëse do t’ia kërkojë Prokuroria e Posaçme AntiKorrupsion (SPAK), dhe theksoi se ky është fillimi për zyrtarët që kanë abuzuar.
Shkëlqim Hajdari: ”Sot ka ndodhur një ngjarje historike që sapo ka filluar. Gjithçka është e qartë SHBA-të disponojnë prova qe Berisha bashkë me familjarë e zyrtarë është përfshirë në afera korruptive. Kjo duhet ta gëzojë popullin shqiptarë. Nëse SPAK i kërkon provat DASH i sjell ato në Shqipëri. Ky është fillimi i një tërmeti për ata zyrtarë që kanë abuzuar.”
Ish-kryeministri Sali Berisha u shpall non-grata sot nga Departamenti Amerikan i Shtetit bashkë me familjen e tij.
Lajmi për shpalljen ”non grata”, u dha nga Sekretari Amerikan i Shtetit, Antony Blinken, i cili njoftoi zyrtarisht se Berisha ka minuar demokracinë, dhe se gjatë ushtrimit të detyrës së kryeministrit, është përfshirë në afera korruptive.
Në faqen zyrtare, DASH ka publikuar vendimin e plotë, ku thuhet se Berisha ka qenë i përfshirë në veprime korruptive për shpërdorim të fondeve publike, dhe ndërhyrje në proceset publike duke përdorur pushtetin.
Në vendimin e tij, Blinken ka përcaktuar si të papërshtatshëm edhe bashkëshorten e ish-kryeministrit Liri Berisha, djalin Shkëlzen Berisha dhe vajzën Argita Berisha Malltezi.
