Ish-kryeministri Berisha është pyetur sot nëse mund të kishte një bashkëpunim PD-PS. Ky version është hedhur poshtë në mënyrë kategorike prej tij, madje do e cilësonte si dramën më të madhe të shqiptarëve.
Ngacmuar nga gazetarët në deklaratën për shtyp, se nëse do të ishte kreu i PD-së, cili do të ishte vendimi ndaj ambasadores Kim, ai shpërtheu duke thënë se qëndrimi i saj ishte skandaloz.
Bashkëpunim PD-PS?
Berisha: Do ishte drama më e madhe e shqiptarëve. Opozita është shpresë.
Non grata për Metën?
Berisha: Nuk kam informacion për asnjë njeri. Një praktikë e tillë jo vetëm që nuk shërben, por kthehet kundër.
Nëse do ishit kreu i PD, cili do ishte vendimi juaj ndaj ambasadores Kim?
Berisha: Deklarata e Kim në oborrin e PD është më skandalozja. Kërcënimi që u bëri demokratëve dhe shqiptarëve, po atë ditë i kërkova të kërkojë ndjesë. PD duhet t’i kërkojë zonjës që të kërkojë ndjesë dhe padiskutim të mbetet e hapur për bashkëpunim.
Ambasadorja amerikane Yuri Kim sugjeronte që PD-ja, “të mos hajë bar” për interesat e një njeriu të vetëm, pra Berishës. Fabula e Kim lidhet me kërkesën e përsëritur të ndërkombëtarëve që Partia Demokratike në opozitë, të ndjekë rrugën institucionale parlamentare dhe jo si në të shkuarën, të bojkotojë Parlamentin.
Ambasadorja Yuri Kim u takua me Bashën dhe deklaroi pas takimit se PD “do të rikthehet në parlament në shtator”. Vetë Basha nuk bëri deklaratë pas takimit. Sali Berisha e konsideroi deklaratën e Yuri Kim, një fyerje për demokratët. /Tirana Today
