Gjashtë ambasadorë zbarkuan tek PD-ja sot për të takuar Bashën. Takimi ka zgjatur për rreth 75 minuta, e ndërsa nuk ka pasur një deklaratë për mediat nga asnjëra prej palëve.
Fokusi kryesor i diskutimeve kanë qenë zhvillimet e fundit në Partinë Demokratike. Diplomatët e huaj u pritën në hyrje të PD-së nga Sekretari i Përgjithshëm, Gazment Bardhi dhe nënkryetarja Jorida Tabaku. Ambasadorja amerikane Yuri Kim u shpreh se sot është një ditë e bukur, sapo ajo takoi Bardhin e Tabakun. “Ditë me diell. Ditë shumë e bukur sot”, i thotë ajo Tabakut, teksa futej brenda në PD.
Partia Demokratike paditi në Prokurorinë e Posaçme mbështetësit e ish-kryeministrit Sali Berisha, që ndryshuan vulën dhe logon e partisë. PD kallëzoi deputetët Belind Këlliçi, Edmond Spaho, Albana Vokshi po ashtu dhe Ivi Kaso e Ervin Minarolli, për veprën penale “Falsifikim i vulave, i stampave ose i formularëve” i kryer në bashkëpunim, parashikuar nga Neni 190 paragrafi i 2 dhe 25 i Kodit Penal. Në kallëzim thuhet se këta demokratë kanë pasur funksione në parti, dhe e dinë shumë mirë se si funksionon rregullorja e statutit. Sipas PD-së, këta persona e kanë kryer këtë vepër penale për të realizuar qëllimet e tyre, duke qenë në dijeni të pasojave ligjore që do të kenë.
“Këta janë persona që kanë patur funksione në PD, kanë dijeni për rregullat e statutit, dhe e kanë kryer veprën penale të përdorimit të vulës dhe simboleve për të realizuar qëllimet e tyre, pavarësisht se ishin në dijeni të pasojave ligjore”, thuhet në kallëzim.
Pasi PD-ja kallëzoi në SPAK mbështetësit e ish-kryeministrit për falsifikimin e vulës dhe formularëve, menjëherë erdhi një reagim nga Komisioni i Rithemelimit të PD.
Në reagim thuhet se akte të tilla nga ana e kreut demokrat, Lulzim Bashës, tregojnë qartë se lidershipi ka prekur fundin moral dhe politik. Sipas Komisionit, marrëveshjet e fshehta mes Bashës dhe Ramës me vula dhe brava është i pashpresë.
