Opozita shqiptare nuk tërhiqet nga skenarët rusë për të destabilizuar vendin. Pasi dështuan me sulmin ndaj Kryeministrisë, krerët e LSI dhe të PD kanë porositur militantët që të sulmojnë godinën e Parlamentit. Ndonëse Gramoz Ruçi anuloi seancën e sotme plenare që ishte parashikuar, opozita ka vendosur që të vijojë protestën dhe të mos tërhiqet aspak nga skenari i saj.
Burime shumë të sigurta të gazetës nga PD thanë se do ndiqet e njëjta strategji si te Kryeministria. Turma do të mësyjë drejt hyrjes së Parlamentit, me qëllim që për të hyrë në sallë dhe shkatërruar gjithçka. Pra duket se do kemi një skenar maqedonas. Në Shkup një vit më parë turma sulmoi Parlamentin dhe rrahu deputetë e shkatërroi gjithçka.
Por mesazhi që kërkon të japë opozita shqiptare është se Parlamenti tani nuk është më legjitim dhe nuk duhet të funksionojë më. Nëse deputetët do ishin në sallë, plani ishte që ata të sulmoheshin fizikisht, por duke qenë se seanca është anuluar, atëherë do tentohet shkatërrimi i gjithçkaje që gjendet aty. Një tjetër detaj është se shumica e militantëve janë pajisur me maska kundërgaz.
Duke qenë se policia te Kryeministria i shmangu përmes gazit lotsjellës, PD e LSI kanë blerë me qindra maska kundërgaz dhe ata që do të qëndrojnë në frontin e protestuesve do pajisen me to, me qëllim që të mësyjnë Parlamentin. Ajo që e konfirmon këtë është dhe vetë policia. Përmes një deklarate për mediat, polica ka bërë me dije se nga shërbimet informative ka marrë informacion që militantët janë porositur që të përplasen me policinë dhe ushtarët e gardës. Duke qenë se policia nuk vepron dot sot me të njëjtin skenar si te Kryeministria, turma do tentohet të ndalet nga forcat speciale. Por militantë janë porositur që të sulmojnë forcat e rendit.
“Nga informacionet e mbledhura nga shërbimet përkatëse, ka të dhëna për nxitje të dhunës dhe organizime me natyrë kriminale. Synohet hyrja me forcë në sallën e Parlamentit, duke ushtruar dhunë mbi personelin që ka detyrimin ligjor të sigurojë mbrojtjen e institucionit themelor të demokracisë. Për të parandaluar çdo mundësi të tillë, Policia e Shtetit, u bën apel në radhë në radhë të parë organizatorëve që të distancohen hapur nga dhuna dhe të bëjnë thirrje për respektimin e ligjit nga çdo protestues. Po ashtu Policia e Shtetit u bën apel të gjithë atyre që duan të ushtrojnë nesër lirinë e tubimit dhe të drejtën e protestës, që të mos përfshihen në asnjë rast e për asnjë arsye në veprime të dënueshme ligjërisht”, thuhet në deklaratën e policisë.
Skenarët që do të ndjekë opozita
Ndryshe nga sa ndodhi para Kryeministrisë, ku kishte qytetarë dhe militantë të kategorive të ndryshme, sot para Parlamentit do të jenë persona të rrezikshëm dhe individë të flaktë të PD, sidomos besnikë të Sali Berishës. Përveç maskave kundërgaz, militantët do të sulmojnë Parlamentin dhe me flakadanë e sende të forta, por dhe me bomba molotov. Kjo do të ndodhë nga selia e PD.
Ndryshe nga Kryeministria, menaxhimi i situatës te Parlamenti nga policia është më i vështirë. Gazeta ka mësuar se do të vendoset një kordon policie nga Kalaja e Tiranës e deri te Xhamia. Po ashtu do angazhohen forcat RENEA, FNSH si dhe autobote me ujë. Ndërkohë godina u rrethua dje me tela me gjemba, për të penguar turmën. Por demokratët do përdorin selinë e tyre, pasi godina e PD është në krah të Parlamentit. Skenari është që të mësyhet në tre anë. Një grup do sulmojë nga pjesa e Pedonales, një përballë dhe tjetri nga selia e PD.
Por kjo pritet të sjellë konfrontim me policinë. Te Kryeministria turma u la të sulmojë derën, por te Parlamenti nuk do ndodhë kështu, pasi aty ka disa hyrje dhe ka dritare. Për këtë arsye policia ka paralajmëruar dje se do zbatojë ligjin për të mos lejuar mësymjen në sallë dhe ka vendosur tela me gjemba. Megjithatë kjo tregon qartë se Berisha, Basha, Meta e Kryemadhi po synojnë të ndezin flakë vendin. (Burimi:gazeta SOT)
