Kryedemokrati Basha e bëri të qartë në një deklaratë për mediat, se nuk ka asnjë forum që kthen pas vendimin për përjashtimin e ish-kryeministrit Berisha.
Në kundërpërgjigje, Berisha shkruante në rrjetet sociale se Kuvendi i Partisë Demokratike do të mblidhet në përputhje me statutin e Partisë Demokratike, dhe sipas tij, askush nuk mund ta pengojë atë.
Ndër të tjera, ish-kryeministri Sali Berisha, u shpreh se Kuvendi duhet të mblidhet edhe për të shpëtuar Partinë Demokratike nga lideri aktual që e drejton atë. Vendimi për përjashtimin nga grupi parlamentar i PD, bëri që Berisha të sulmojë ashpër Lulzim Bashën duke e cilësuar një lider të pabesë dhe të paaftë për ta çuar partinë në fitore.
Berisha, dy ditë më parë nga një takim që pati me demokratët e qarkut të Fierit, kërcënoi liderin demokrat Lulzim Basha, se do ta shkarkojë nga posti i kryetarit, duke thënë se Basha duhet të lërë mandatin dhe të ikë andej nga erdhi.
Ai e cilësoi Bashën si liderin që i ka bërë më shumë dëm një partie se askush tjetër, ndërsa theksoi se pabesia dhe mungesa e parimeve morale të Bashës, po dëmtojnë PD.
