Policia arriti të parandalojë ditën e sotme një ngjarje të rëndë, teksa një 39-vjeçar tentoi t’i jepte fund jetës duke tentuar të vetëdigjej.
Shtetasi Uljan Kolgjegja, me profesion taksist tentoi të vetëdigjej përpara kryeministrisë, pasi kishte dy ditë pa punë. Në momentin që ai është ndaluar nga policia, ai mbante një shishe me benzinë në dorë.
Bëhet me dije se policia rrugore i kishte hequr atij lejen e drejtimit dhe kështu ai nuk mund të ushtronte profesionin e tij si taksist.
Ndaj, Kolgjegja në kushte të rënduara psikologjike tentoi t’i jepte fund jetës. Forcat Shqiponja kanë ndërhyrë në kohë dhe e kanë shoqëruar atë në komisariat, ku ka deklaruar se pse vendosi të ndërmarrë këtë akt të frikshëm.
Uljan Kolgjegja nuk është një emër i panjohur për publikun. Ai është bërë i njohur fillimisht, pasi bëri tatuazh në gjoks ish-kryeministrin, Sali Berisha. Por pak më vonë duket se 39-vjeçari u pendua dhe e mbuloi atë me një tatuazh tjetër.
Taksisti i njohur ka bërë tatuazh në krah edhe moderatoren, Marina Vjollca, e cila më pas publikoi edhe një foto me të.
