Kryetari i Libra, Ben Blushi foli ashpër kundër marrëveshjes së Partisë Demokratike dhe Partisë Socialiste që u arrit mbrëmë dhe u zbardh sot pasdite. Blushi nga Korça tha se qeveria e Shqipërisë u nda si plaçkë ndërmjet PD-së PS-së dhe LSI-së.
Blushi: Më mirë që PD-ja u fut në zgjedhje se i mundim më lehtë brenda parlamentit sesa jashtë tij. PS dhe PD në marrëveshjen e tyre kanë vendosur të bashkqeverisin. PS, PD dhe LSI-ja kanë vendosur të bashkqeverisin duke ndarë ministrat midis tyre. Qeveria e Shqipërisë u nda si plaçkë. Partia Demokratike kërkonte të ishte në qeveri pa zgjedhje, ajo u fut në qeveri për të qeverisur me PS dhe LSI-në. Qeveri u nda në tre pjesë, dikush mori dogana, dikush arsimin, dikush burgjet, dikush energjinë, dikush hipotekat, dikush mori Aluizmin. Kjo është marrëveshja që është mbajtur sot, marrëveshje për bashkëqeverisje. Shqipëria nuk ka votuar për këtë bashkëqeverisje.
Ben Blushi nuk mori pjesë në takimin e mbrëmshëm të thirrur nga PR dhe PAA për zgjidhjen e krizës politike. Ai u shpreh se mbrëmë nuk do të arrihej një marrëveshje politike por ajo u arrit. Blushi kërkoi një datë zgjedhjesh sa më të shpejtë dhe ajo sipas marrëveshjes është më 25 qershor. Me sa duket Ben Blushit nuk i dalin parashikimet dhe ai nuk është i kënaqur me marrëveshjen.
