Sigurimi i Shtetit ka qenë një prej organeve më të rëndësishme dhe strukturave më të mprehta gjatë viteve të komunizmit në vendin tonë. Edhe pse detyra e tyre ishte të mbronte Shqipërinë nga rreziqet, ai shërbeu për të shtypur popullin dhe pasur në dorë gjithë njerëzit të cilët guxonin të kishin mendime kundër sistemit politik.
Por, mes policisë politike të regjimit ishin dhe njerëzit e thjeshtë, të cilët ruanin komshiun, familjarët, për t’i spiunuar më pas. Ku sipas dëshmive të qytetarëve jo pak herë, bëhej fjalë për denoncime banale për inate mes njëri-tjetrit. E të tjerë bëheshin spiunë, pasi i detyronte sistemi dhe organet.
“Ka pasur raste që edhe kemi spiunuar. Normal kur kishim inat një person, diçka do t’i bënim atij. Duke e spiunuar ti fitoje një prioritet nga X person. Në këtë mënyrë edhe unë kam qenë i mbrojtur gjatë komunizmit.”
“I bënin vetë njerëzit ato gjëra, nuk i bënte partia. Përkundrazi partia detyrimisht që bënte punën e vetë, sepse ai sistem ishte. Unë kam punuar në kooperativë, por kam pasur shumë detyra të tjera. Të cilat për në kohën atëherë ishin të ligjshme, mirëpo për sot konsiderohen të jashtëligjshme.”
“Unë kam qenë sekretar partie në Dibër dhe popullin e kam pasur në dorë krejt. Ata të cilët kanë qenë të internuar apo në burg e kanë merituar dënimin. Edhe nëse thoshe që nuk më pëlqen partia, dënoheshe me 8-15 vite burg. Dhe kjo ishte shumë e drejtë, nuk ke pse e shkel ligjin.”
“Teoria e komunizmit është një teori fantastike, atë që kërkojnë gjithë shqiptarët sot. Dhe në atë kohë që të ruaje veten, duhet të bëheshe spiun. Ata që i gjykojnë sot, nuk i kuptoj.”
Ndërkohë, të tjerë shprehen për Tirana Today se veprimet e atyre njerëzve të cilët ktheheshin në spiunë, nuk justifikohen, madje ata duhet të dënohen.
“Nuk justifikohen kurrë ato spiunët, sepse i kanë prishur punë njerëzve dhe gjithë popullit. Regjimi i ndiqte sepse ishin ata spiunë të cilët raportonin. Punën e këtyre të fundit, e kanë vuajtur të tjerët dhe detyrimisht që duhet të dënohen.”
“Nuk i jap asnjë të drejtë atyre që u bënë spiunë. Është e dënueshme, madje më shumë se të bësh një krim. Sepse po spiunove është baras me një krim.” TIRANA TODAY
