Kryenegociatori i BE-së, Michel Barnier, është shprehur se Bashkimi Evropian i ka vendosur vetes 3 qëllime në lidhje me marrëveshjen pas Brexit.
Sipas tij, BE synon që të ketë një marrëveshje deri në fund të vitit të ardhshëm në lidhje me marrëdhëniet e saj të ardhshme me Britaninë e Madhe.
“Rënia dakord dhe ratifikimi i një marrëdhënie pas Brexit deri në fund të vitit 2020, siç kërkohet nga kryeministri britanik, Boris Johnson, do të jetë një sfidë e madhe, por ne do të bëjmë gjithçka që mundemi, edhe nëse nuk do të mund të realizojmë gjithçka. Për çështjet ndërkombëtare, BE do të vazhdojë të angazhohet pozitivisht me Britaninë e Madhe, si në mënyrë bilaterale, ashtu edhe në forume globale, si OKB, OBT dhe G20.
Siguria do të jetë më problematike, sepse thjesht nuk është e mundur një bashkëpunim i së njëjtës shkallë për shkëmbimin e të dhënave me një vend të tretë, që është jashtë zonës së Shengenit.
Në fund, çdo marrëveshje e tregtisë së lirë duhet të parashikojë rregulla të drejta për standardet, ndihmën shtetërore dhe çështjet e taksave”, tha ai.
Sipas tij, nëse këto 3 qëllime arrihen do të thotë se të dyja palët do ta kenë shfrytëzuar në maksimum vitin e ardhshëm.
