Para një muaji, sapo u konfirmuan rastet e para me COVID-19 në Shqipëri, qeveria mori masa të rrepta në kuadër të frenimit të përhapjes së pandemisë.
I gjithë vendi u karantinua, si një masë për të parandaluar infektimin masiv me koronavirus.
Mirëpo masat shtrënguese nuk kanë ndikuar vetëm në parandalimin e përhapjes së COVID-19, por dhe në pastrimin e vendit nga ndotja.
Bashkimi Evropian ka publikuar një video, ku shprehet se: “Në Tiranë është shënuar niveli më i ulët i ndotjes për herë të parë që nga fillimi i zbatimit të projektit #GreenLungs. Në mbrëmjen e 7 prillit u regjistrua për herë të parë në zonën e 21 Dhjetorit vlera 0mg/m3 për grimcat PM2.5 dhe PM10”.
Mesazhi i plotë i BE: “Përveç lajmit të mirë se thuajse përditë shtohet numri i personave të shëruar nga COVID-19, një tjetër lajm i mirë gjatë këtyre ditëve të karantinës është përmirësimi i cilësisë së ajrit.
Në Tiranë është shënuar niveli më i ulët i ndotjes për herë të parë që nga fillimi i zbatimit të projektit #GreenLungs, i financuar nga Bashkimi Evropian dhe i zbatuar nga rrjeti organizatave mjedisore të udhëhequra nga Co-PLAN Institute for Habitat Development dhe Milieukontakt Albania (member of Milieukontakt International Network). Në mbrëmjen e 7 prillit u regjistrua për herë të parë në zonën e 21 Dhjetorit vlera 0mg/m3 për grimcat PM2.5 dhe PM10.
Shihni videon për t’u informuar më shumë rreth cilësisë së ajrit, përpara dhe gjatë periudhës së karantinës në Tiranë”.
