A do të rikthehet Ilir Meta në politikë? Kjo është pyetja e cila ndezi një debat të nxehtë mbrëmjen e djeshme, në emisionin “Open” në “Top Channel” mes Andi Bushatit dhe Baton Haxhiut. Baton Haxhiu tha me ironi se kreu i shtetit ka më shumë foto me kafshë, sesa me zyrtarë. “Kam dalë në përfundimin se Meta ka më shumë foto me qenë e mace, se me zyrtarë”.
Sipas tij, ky nuk është itenerari që një president duhet të ndjekë. Haxhiu tha se Meta pas 13 tetorit nuk ka më fuqi politike për të qenë në detyrë. Ai shtoi më tej se është e patolerueshme sjellja e Metës me dekretime dhe çdekretime data zgjedhjesh.
“Tani çështja është a do mbahen zgjedhjet, e pastaj nëse dorëheqja do jetë morale apo për shkelje kushtetute. Meta pas datës 13 tetor nuk ka më fuqi politike për të qenë në detyrë. Me gabimet e tij dekreton dhe çdekreton pa arsye data zgjedhjesh, nuk mund të rrijë më në detyrë.
Ka qenë president i keq, ka pasur probleme serioze në 7 mujorin e fundit”, tha ai.
Ndërsa analisti Andi Bushati, duke iu përgjigjur pyetjes nëse Meta duhet të japë dorëheqjen apo jo, ai e cilësoi si një kukull qesharake.
‘Ç’kuptim ka të rrijë në detyrë, po nuk e përfilli njeri 13 tetorin, ç’kuptim ka të rrijë kur nuk ia përfilli njeri 30 qershorin?”.
“Është një kukull qesharake, e një regjimi që ka kap çdo gjë tjetër.
E pengon dot Meta vjedhjen e zgjedhjeve, etj etj…
Ai nuk e ka më luksin të bëjë rolin e presidentit të një republike normale”, tha Bushati më tej.
