Analisti Baton Haxhiu, i ftuar në ‘Top Talk’ ka folur mbi çështjen e zgjedhjeve në Kosovë. Ai u ndal te marrëdhëniet e kryeministrit Edi Rama me kryeministrin e ri të Kosovës, Albin Kurtin. Me fokus tek fjalimi i djeshëm i kryeministrit të Kosovës, Albin Kurti, ai iu referua kritikave që bëri drejtuar qeverisë shqiptare.
“Kritika e parë që ishte dje në fjalimin e z. Kurti ishte drejtuar qeverisë së Shqipërisë. Dhe për faktin se nuk ka ndodhur asnjëherë në logjikën politike, dhe në qëndrimet publike, kjo mund të them është fillimi që Kosova dhe Shqipëria janë në një zonë politike”, u shpreh ai.
Haxhiu dha opinionin e tij lidhur me marrëdhëniet mes dy shteteve, duke nënvizuar se qejfmbetjet nuk kanë vend. Ai shtoi se Kurti duhet të kërkojë falje për lançimin publik ndaj Edi Ramës dhe Gent Cakajt.
“Unë mendoj që marrëdhëniet mes dy shteteve dhe mes dy kryeministrave nuk duhet të kishin qejfmbetje, por z. Kurti do duhej të kërkonte falje për lançimin publik ndaj Ramës, e sidomos ndaj ministrit të Jashtëm, Cakaj; lançimin e pashembullt të një politikani dhe të një partie politike për të cilin ka lënë shije të keqe në marrëdhëniet jo vetëm njerëzore, por edhe në marrëdhëniet politike”, deklaroi analisti.
Më tej, Haxhiu shtoi se rrethanat dhe rezultatet në fjalë do të shpien në krijimin e një arene të përbashkët politike, ku do ketë përplasje mes Vetëvendosjes dhe PS-së.
“Por unë mendoj që Vetëvendosja, për faktin se çfarë është opozita në Shqipëri do të jetë pjesë e fushatës zgjedhore në Shqipëri dhe debatet Vetëvendosje- PS do të ashpërsohen, dhe nuk do jenë debate të buta tani e tutje”, tha ai.
