Bashkia e Devollit e ka nisur ditën me trazira, pasi mbështetës të opozitës janë mbledhur para këtij institucioni, për të protestuar për marrjen e detyrës nga kryebashkiaku i ri socialist, Eduard Duro.
Pjesë e protestës është bërë edhe ish-kryebashkiaku demokrat, Bledion Nallbati, i cili ka deklaruar se bashkia është pushtuar dhe administrata nuk mund të punojë nën terrorin e policëve. Në fjalën e tij para gazetarëve, Nallbati tha se do të vazhdojë t’iu shërbejë qytetarëve dhe do shkojë çdo ditë te bashkia.
“Bashkia u dhunua në prezencë të deputetëve dhe prefektit të Korçës. Brenda bashkisë ka Forca Speciale. Unë jam kryetari i ligjshëm i bashkisë, i zgjedhur nga 59% e qytetarëve. Do jem këtu çdo ditë, 24orë në ditë.
Do të vazhdoj t’iu shërbej qytetarëve. Bashkia është pushtuar. Nuk di ç’ka ndodhur me dokumentacionin që ndodhet në zyrë. Administrata nuk mund të hyjë në bashki dhe të nisë punën nën terrorin e policisë”, tha Nallbati.
Kujtojmë që kryebashkiaku i ri socialist, Eduard Duro është paraqitur në këtë bashki që në orën 06:30 të mëngjesit, i shoqëruar nga 30 forca të policisë.
