Në studion e “Opinion”, Lulzim Basha theksoi se Ilir Meta nuk mund të jetë president konsensual. Duke ju përgjigjur pyetjes së panelit të gazetarëve, që ndodhen përballë tij në studio, Basha u shpreh se për kandidaturën e Metës nuk u pyetën as qytetarët e as faktorët politikë, për këtë arsye ai nuk mund të jetë konsensual.
“Ju duhet ta dini që një numër i madh deputetësh të LSI dhe të PS janë të shokuar nga ky lajm, sepse kanë besuar diçka tjetër. Ndërsa përshëndetjet e mia nuk i janë drejtuar asnjëherë asnjë personi, as Ilir Metës. I janë drejtuar qëndrimeve të mbajtura në momente të caktuara. Ulen dy njerëz në restorant dhe vendosin kush do jetë president. Në kulmin e një krize politike këta, me një pazar politik kanë mbyllur dhe kreun e shtetit”.
Në nisje të emisionit, Basha u pyet edhe për situatën në Maqedoni, nëse Shqipëria rrezikon të kthehet në të njëjtën situatë. Basha e hodhi poshtë një gjë të tillë dhe u shpreh se dy vendet nuk ndodhen në kushte të njëjta politike, raporton tvklan.al.
“Nuk ka asnjë paralele mes gjendjes në Maqedoni edhe krizës që Maqedonia po përjeton me krizën politike ne Shqipëri. Ndryshimi është i qartë. Është një ngjarje shumë e rëndë dhe tronditëse. Edhe më tronditëse për ne shqiptarët duke qenë që edhe një numër deputetësh shqiptarë janë sulmuar fizikisht. Ia vlen të theksohet se zgjedhjet u certifikuan me Gruevskin. Nga ky moment kriza ka marrë nota nacionaliste. Si kryetar i opozitës shpreh mbështetjen tonë për të qenë sa më të bashkuar. Interesi ynë si shqiptar është një Maqedoni e qetë me një perspektivë evropiane. Nga një anë kemi krizë politike të provokuar nga përgjimet e kasetave, përplasje janë shkak dhe pasojë që luhen mes dy partive. Në Shqipëri po luftohet për zgjedhje të lira dhe të ndershme.
