Kryetari i Partisë Demokratike, Lulzim Basha komenton vendimin e Kolegjit Zgjedhor e cila nuk e njeh dekretin e presidentit Meta.
Basha, në një deklaratë për mediat tha se ky institucion u përdor nga kryeministri Rama si një makinacion për të krijuar një ligjshmëri false.
“Asnjë institucion përveç Gjykatës Kushtetuese nuk mund të shprehet për dekretin e presidentit. Vendimi i sotëm dihej prej disa ditësh”, u shpreh kryedemokrati.
Basha vijoi më tej duke thënë se me largimin e opozitës nga kuvendi, fasada e kryeministrit që mbulonte regjimin autokratiko-kriminal ra.
Deklarata e plotë:
“Asnjë institucion përveç Gjykatës Kushtetuese nuk mund të shprehet për dekretin e presidentit. Vendimi i sotëm dihej prej disa ditësh. Me veprimin e tij, Kolegji Zgjedhor sot provoi edhe një herë se vendimi ynë për të mos hyrë në këto zgjedhje farsë ishte vendim i duhur. Sjellja e kolegjit provoi se edhe dorëzimi i mandateve parlamentare ka qenë, gjithashtu, një vendim i drejtë i opozitës. Regjimi autokratiko-kriminal i Edi Ramës ka nevojë për fasadë për të mbuluar thelbin e tij. Me largimin tonë nga institucionet e kapura prej tij ne ia hoqëm këtë fasadë dhe tani të gjithë po shohim fytyrën e vërtetë të regjimit të Edi Ramës”, tha më tej Basha.
