Në një prononcim për mediat, kryetari i PD-së, Lulzim Basha, tha se me të fortët dhe kriminelët nuk shkohet në zgjedhjet e 30 qershorit. Pas qëndrimit të Ramës nga Ura Vajgurore dhe thumbimin që i bëri opozitës së bashkuar, kryedemokrati Basha vendosi pikat mbi ‘i”, duke thënë se është tallje që ti kërkosh opozitës që të ulet në të njëjtin vend me kriminelët në Kuvend. Në vazhdën e akuzave, kreu i PD-së tha se Rama legalizoi kanabisin dhe tregtinë e drogës, ndërsa ftoi qytetarët në protestë, për çlirimin e Shqipërisë.
Në një komunikim nga selia blu, pas publikimit të përgjimeve nga “Bild”, Basha citoi se shteti dhe krimi janë bërë një, ndërsa akuzoi edhe një herë kryeministrin Edi Rama se erdhi në pushtet falë aleancës me krimin.
“Lidhjet e Ramës me krimin kanë filluar që para se të bëhej kryeministër. Që kur ishte kryetar bashkie u bë lavatriçe për pastrimin e parave të pista. Përmes lejeve të ndërtimit, Rama ndërtoi një elitë politike në Tiranë dhe bleu drejtimin e PS. Bashkëpunimin me krimin e ktheu në model politik. Me anë të aleancës PS-krim, mori pushtetin në 2013.
Siç e ka dëgjuar tashmë Europa dhe bota, sot në Durrës nuk ka asnjë vijë ndarëse mes krimit dhe PS. Bandat janë shtabe elektorale të PS, kokat e krimit, shefa të administratës publike, ndërsa drejtues socialistë koordinojnë çdo veprim me kriminelët. Kjo është shkrirje e krimit dhe politikës në një.
Rama lejoi kanabizimin e vendit. Ishte një projekt i vetëdijshëm pasi Rama e sheh krimin si faktor ekonomik, me të cilat ndërton pallate. Këtë model zbatoi në të gjithë Shqipërinë, duke lejuar dhe bekuar kanabisin”, u shpreh Basha.
