Kreu i PD-së, Lulzim Basha, në fjalën e tij në Kuvendin Kombëtar të PD-së, tregoi se qëllimi i kësaj mbledhje sot është për të thënë disa të vërteta që kanë kohë që nuk thuhen. Kryedemokrati Basha iu drejtua të pranishmëve, se janë mbledhur në emër të së vërtetës, pasi e vërteta është e vetmja rrugë për çlirimin e demokracisë. Ai dha një tjetër mesazh kundrejt demokratëve, se nuk janë mbledhur për t’i rrahur shpatullat njëri-tjetrit e as kryetarit, por për të thënë të vërtetat që kanë kohë pa i shqiptuar.
“Dua të shpreh kënaqësinë nga zemra, tek ju shoh të gjithëve bashkë. Në një ditë kur kemi shumë për të thënë, ndaj duhet edhe durim! Duhet edhe mirëkuptim edhe për ata që kanë pasur kaq shumë për të thënë, por nuk u është dhënë koha e vendi. E për të tjerët që do flasin, e kur të flasim të gjithë bashkë me votë, në këtë Kuvend për të marrë vendimet që presin demokratët, Shqipëria, kombi shqiptar.
Vëllezër e motra, s’jemi mbledhur për t’i rrahur shpatullat njëri-tjetrit e as kryetarit, por për të thënë të vërteta që kemi kohë pa i shqiptuar, ose siç e tha profesor Uka, vetëm i kemi belbëzuar.
E di që shumë mezi presin t’i dëgjojnë që disa mund të mërziten prej tyre, por sot jemi mbledhur në emër të së vërtetës se e vërteta është e vetmja rrugë për çlirimin e demokracisë”.
