Lëvizja Socialiste për Integrim rrezikon që të shkojë në humnerë. Djegia e mandateve dhe bojkoti i zgjedhjeve vendore, po rezulton një malore e vështirë për partinë e presidentit. Vetë Ilir Meta duket se ke kuptuar diçka të tillë, dhe përmes aleatëve të Bashës ka nisur tentativat për të marrë frenat në dorë.
Kreu i shtetit u tregua i gatshëm të ulë palët të negociojnë, me shpresën se do ketë në kontroll të gjitha negociatat mes tyre. Por plani i tij rrezikon të dështojë. Javën që lamë pas ishte kreu i grupit të PS, Taulant Balla, ai i cili u shpreh se PS nuk ulet në asnjë tryezë me kushte. I vetmi dialog është për reformën zgjedhore. Por dje kundër Metës duket se ka dalë dhe kreu demokrat Lulzim Basha.
Pas një takimi që zhvilloi me kryetaren e LSI, Monika Kryemadhi në selinë e LSI, Basha i pyetur nga mediat nëse do ulet në tryezën që mund të thërrasë Meta, u shpreh se nuk do dialogojë pa u larguar Rama. Duke i mbyllur në këtë mënyrë derën presidentit.
“Asgjë nuk ka ndryshuar në qëndrimin e opozitës së bashkuar dhe koalicionit tonë politikë, koalicionit më të madh, mazhorancës së re numerike, politike dhe morale të vendit : Largimi i Edi Ramës është kusht i panegociueshëm për të hapur rrugën e dialogut politik që do të çojë drejt qeverisë tranzitore. Detyrat e së cilës, në veçanti sa i përket organizimit të zgjedhjeve të lira dhe të ndershme, do t’i shpalosim nesër publikisht në orën 11:00 në Tiranë në praninë e medias, përfaqësuesve më të lartë të koalicionit dhe një numri të madh të ftuarish”, tha ai. Me deklaratën e Bashës dje, duket se si PD ashtu dhe PS nuk duan që të ndërhyjë presidenti Meta. Ky i fundit duket se e ka kuptuar se nga gjithë kjo histori, LSI është më e dëmtuara dhe po teton të marrë situatën në dorë, por pa sukses deri më tani.
Goditja e dytë për LSI
Përveç lënies jashtë të Ilir Metës, Basha duket se po çon LSI drejt humnerës edhe sa i takon koalicioneve. Sot skadon afati për regjistrimin e koalicioneve për zgjedhjet vendore dhe sinjalet janë se do ripërsëritet ajo që ndodhi në vitin 2017. Edhe pse Rama e Basha ranë dakord për të shtyrë me një javë zgjedhjet dhe PD u pranua të regjistrohej, nuk u ndryshua asgjë sa i takon koalicioneve. PD, PS e LSI hynë të ndara në zgjedhje.
Por kjo do të thotë se nëse arrihet një gjuhë e përbashkët mes palëve në ditë në vijim, mund të ndodhë që PD e LSI të shkojnë sërish ndarazi dhe kjo do e fundoste LSI. Partia e presidentit nuk është forcë e parë në asnjë qytet dhe do e ketë të pamundur që të fitojë përballë kandidatëve të PS apo të LSI, si për kryetarë bashkie, ashtu dhe për këshilltarë bashkiakë. Në një farë mënyre, sot është vulosur fati i opozitës dhe tani nuk ka më kthim pas. Çdo ditë që kalon forcohet ideja se PD po e çon drejt humnerës LSI. Nga braktisja e zgjedhjeve, partia e presidenti është më e rrezikuara sepse i vetmi elektorat që i ka mbetur është në 7 bashki të drejtuara prej saj. Duke i humbur ato, me shumë gjasë punonjësit që janë aty do kalojnë me partinë fituese. Sa i takon PD, kjo forcë dobësohet, por ka elektoratin e saj bazë që nuk ndryshon. Mbetet të shihet se çfarë do ndodhë, pasi vetë presidenti ka nisur të bëhet protagonist duke tentuar të marrë frenat në dorë. Meta po sulmon hapur qeverinë dhe po jep sinjale se po trembet nga braktisja e zgjedhjeve. /Gazeta SOT
