Kreu i Partisë Demokratike, Lulzim Basha, në një takim me mbështetës të opozitës në Elbasan, tha se nuk do të pranojë për asnjë arsye pazare me të keqen.
Ndërsa kryeministri i dërgoi një ditë më parë letrën e gjashtë publike për dialog, kryedemokrati Basha, mjaft i entuziasmuar teksa ndodhej pranë mbështetësve, nënvizoi se largimi i Ramës është i panegociueshëm.
“Çdo ditë që kalon, e bën më të thekur bindjen tonë se nuk ka zgjidhje politike pa largimin e Edi Ramës, pa largimin e bandës që ka marrë peng vendin. Shqiptarët e bashkuar kanë vendosur gjithçka, e dimë se nuk ka e nuk mund të ketë as liri, as zgjedhje të lira, as çlirim nga oligarkia që ka kapur për fyti Shqipërinë, pa larguar shkaktarin numër një të kësaj krize, njeriun që vodhi financat e shtetit, i vuri shqiptarëve kularin në fyt.
Tani bëhet gati të çimentojë pushtetin e krimit, bëhet gati të nxjerrë kamzhikun e diktaturës, për t’i ulur kokën shqiptarëve. Nuk e pranon Shqipëria këtë, prandaj të dielën të bashkohemi të gjithë në Tiranë. Ditë për ditë shqiptarët dhe mbarë bota lemeriten me përmasat e korrupsionit të Edi Ramës, kurrë më parë aferat korruptive nuk kanë marrë këto përmasa. E patë lajmin e fundit botuar nga BIRN, 216 kontrata sekrete, qindra milion euro që jua marrin ju. Para që vidhen e shpërdorohen. Tani vjedhjen e bëjnë me kontrata sekrete që as nuk publikohen më. Kjo bandë ka vjedhur 4.6 miliard euro vetëm katër vitet e fundit. Këto para që marrin me taksa, nuk i shkojnë kurrë njerëzve.
Nuk ka vlera europiane pa zgjedhje të lira dhe pa çuar para drejtësisë politikanët e kapur duke vjedhur vota. Rama erdhi në pushtet me krimin. Këtu në Elbasan krimi diktoi mandatet e krimit, nuk janë deputetë të Elbasanit, por të bandave të drogës. Çdo akt i parlamentit është ilegjitim, nuk i njohim dhe do t’i zhbëjmë. Nuk i i njohim aktet e një parlamenti kukull të krimit. Edhe kjo që po bëjnë për ligjin, për Akademinë e Shkencave është diktaturë, duan t’u mbyllin gojën intelektualëve”, tha Basha.
