Pas sulmit ndaj mjetit të Fatos Lubonjës, reagimi i radhës ka ardhur nga kreu i PD-së, Lulzim Bsha. Teksa dënon me ashpërsi sulmin ndaj Lubonjës, ai bën përgjegjës kryeministrin Rama. Sipas tij, kjo dhunë fizike vjen pas sulmeve të Ramës kundër zërave kritikë dhe medias jashtë kontrollit të tij.
“Dënoj me ashpërsi dhunën e drejtuar kundër intelektualit publik Fatos Lubonja. Kjo dhunë fizike vjen në klimën e dhunës psikologjike, gjuhës së urrejtjes dhe sulmeve të Edi Ramës kundër zërave kritikë dhe medias jashtë kontrollit të tij. Është detyra jonë të mbrojmë dhe mbështesim zërat e lirë si Fatos Lubonja ndaj ju ftoj të gjithë të solidarizohemi me të dhe çdo media dhe zë kritik”, shkruan Basha.
Një person ka sulmuar me gurë makinën e publicistit të njohur, duke shkatërruar xhamin e parë të mjetit. Personi që ka kryer sulmin ka tentuar ta shantazhojë edhe disa herë të tjera Lubonjën, duke e sharë indirekt apo duke bërtitur nëpër shkallë, por analisti nuk e ka denoncuar atë në polici, për shkak se njihet si person me probleme të shëndetit mendor.
