Në një kohë kur të gjithë po presin dakordësinë për Reformën Zgjedhore, kreu i PD Lulzim Basha ka shpërthyer në akuza ndaj kryeministrit Rama.
Sipas Bashës, Rama shkatërroi ekonominë shqiptare, dhe nuk i ka ndihmuar shqiptarët as pas tërmetit dhe as tani gjatë pandemisë.
Me anë të një videoje të shpërndarë në rrjetin social Facebook, kryedemokrati Basha shprehet se propaganda me regji qëndrore e Ramës, nuk e fsheh dot dështimin.
Në vazhdën e akuzave, kreu i PD-së shprehet se kryeministri Rama, lekët e shqiptarëve i çon në xhepin e oligarkëve dhe për shpenzime luksi.
Statusi
RAMAVIRUSI shkatërroi ekonominë dhe varfëroi shqiptarët edhe më shumë gjatë pandemisë.
Propaganda me regji qëndrore e Ramës nuk e fsheh dot dështimin. Në prill premtoi se do të punohet me 4 turne (!!!) për të pastruar Thumanën nga rrënojat. Pamjet flasin vetë. “Puna” zgjati aq sa vizita dhe transmetimi me regji qëndrore i mashtrimit të radhës.
Rama nuk i ndihmoi qytetarët as pas tërmetit dhe as gjatë pandemisë. Lekët e shqiptarëve i çon në xhepin e oligarkëve dhe për shpenzime luksi. Në vend që të ndihmonte qindra familje të varfëra, Rama harxhoi qindra mijë euro të taksave tona me charter luksi për fundjavë në Paris. Ekonomia në krizë të thellë, është dështimi i Ramës, i qartë po aq sa gënjeshtrat që ai broçkullit çdo ditë shqiptarëve.
