Lulzim Basha doli në një konferencë për shtyp një ditë pas deklaratës të ish-ministrit të Brendshëm Saimir Tahiri për dorëzimin e mandatit të deputetit.
Basha mesa duket është menduar gjatë për të artikuluar qëndrimin ndaj qeverisë së kryeministrit Rama.
Nga selia e PD-së, Basha përsëriti qëndrimin e ish-kryeministrit Berisha se rruga e Shqipërisë drejt BE-së çlirohet vetëm me largimin e kryeministrit Rama.
Kreu i PD-së e quajti Ramën si kokën e trafikut të drogës, kokë e cila sipas Bashës, e kërkon vetë Gjermania.
Sipas Bashës, Rama kërkon të mashtrojë Gjermaninë duke dorëzuar Tahirin, por në fakt ata janë peng i njëri-tjetrit. Ndaj sipas tij, rruga e vetme mbetet largimi i Edi Ramës dhe krijimi i një qeverie antimafia.
Lulzim Basha: Vetëm pas presionit të Gjermanisë erdhi dorëheqja e Tahirit, si mashtrim për Evropën dhe Gjermaninë për të thënë se ja tani është në dorë të prokurorisë, por në fakt prokuroria është në duart e Edi Ramës. Ky është kodi mafioz midis Ramës dhe Tahirit. Edi Rama është koka e trafikut të drogës, pasi paratë e drogës i duheshin për të blerë zgjedhjet. Rama po pengon komisionin hetimor. Tahiri është një mashë dhe një levë. Ashtu siç vazhdon droga dhe kanabisi të tregtohet jashtë. Ndaj Rama nuk fshihet dot pas Tahirit, që po e përdor për ta shantazhuar. Prokuroria nuk e zgjidh dot. Ajo që i hap rrugë drejtësisë është largimi dhe dorëheqja e Edi Ramës. Nuk ka qeveri që mund të funksionojë me kodet e drogës. Duhet një qeveri antimafia dhe organizimi i zgjedhjeve të lira dhe të ndershme. Tahiri dhe Rama vazhdojnë paktin e tyre mafioz. Por nuk do t’ia dalin dot. Pas Saimir Tahirit është Edi Rama dhe pas Edi Ramës është Saimir Tahiri. Edi Rama dhe çdo ministër i inkriminuar duhet të largohet. Largimi i Edi Ramës do të zhbllokojë rrugën evropiane. Ndaj PD do të vazhdojë të qëndrojë në krah të shqiptarëve për të larguar qeverinë që është kthyer në një makth për të gjithë”, tha Basha.
