“Vendi ‘noton’ në paligjshmëri totale. Duhet ti jepet fund paligjshmërisë”. Ishte ky paralajmërimi i radhës, ardhur nga ana e kryedemokratit Basha, ku në një konferencë për media nënvizoi se vendi ynë ka nevojë për një drejtësi të pavarur. Ai tha se tentativat e Ramës për të kapur Gjykatën Kushtetuese, dëshmojnë qartë se kush nuk e do Reformën në Drejtësi.
“Rasti i përpjekjes së Edi Ramës për të kapur Gjykatën Kushtetuese, tregon qartë se kush nuk e do Reformën në Drejtësi. Shkelja e vazhdueshme e Kushtetutës, kapja e çdo institucioni nuk është më përjashtimi, por rregulli.
Kurajoja që kjo maxhorancë u përpoqën që të shkelnin Kushtetutën, në mënyrë që të kapnin një anëtar të Gjykatës Kushtetuese, dhe lehtësia që u munduan të kalojnë atë, tregon dimensionin e vërtetë kriminal. Është tregues i paligjshmërisë totale. Parlament i paligjshëm. Bëjnë teatër dhe kalojnë ligje, që të vjedhin e kërdisin shqiptarët. Në këtë kuadër, do parë edhe teatri 3-ditor për GJK”, tha Basha.
Për Bashën, zgjedhjet e parakohshme parlamentare, mbeten zgjidhja për krizën politike që po kalon vendi.
“Ka një rrugëdalje nga ky batak Surreli, kthimi në ligjshmëri duke nisur me rikthimin e zgjedhjeve të pandikuara nga krimi. Zgjidhja është rruga që po merr fqinji ynë Maqedonia e Veriut, drejt zgjedhjeve të parakohshme. Zgjedhjet e lira dhe të ndershme, i hapin rrugë reformës së vërtetë në drejtësi”, tha lideri i opozitës.
