Kreu i Partisë Demokratike, Lulzim Basha ka komentuar zgjedhjet lokale, të cilat sipas tij u refuzuan masivisht nga shqiptarët.
Në një deklaratë për mediat, Basha tha se Rama u braktis edhe nga socialistët, ndërsa votimet të cilat i quajti një partiake, sipas kryedemokratit u manipuluan edhe sot.
Teksa falënderoi të gjithë ata që refuzuan të marrin pjesë në zgjedhje, Basha denoncoi sipas tij presionin që i është bërë administratës publike që të votojë së bashku me familjarët, në të kundërt do të humbnin vendin e punës.
Fjala e Bashës:
Sot shqiptarët braktisën në masë maskaradën e Edi Ramës. 85% e votuesve të regjistruar braktisën votimet monistë. Ramën e braktisën edhe socialistët. Votimi një partiak ishte një ngjarje që nuk ndodhte askund në Evropë që nga rënia e komunizmit.
Akoma më tragjik është fakti që edhe pse votimet ishin në çdo element të tyre si të ishin votime të brendshme, ato u karakterizuan nga manipulime masive, si votime të shumëfishta, kërcënime për të marrë pjesë në votime etj.
Regjimi ka ushtruar presion ndaj sektorit të punonjësve të administratës publike, mbi 150 mijë punonjës janë kërcënuar për pushim nga puna në rast se nuk votojnë bashkë me familjarët e tyre. Pjesëmarrja e sotme është pjesëmarrje e punonjësve të marrë nën kërcënim. Rrogëtarët e shtetit u detyruan të dalin me familjarët e tyre që të mos humbasin bukën e gojës së fëmijëve. Atyre ju jap fjalës se do çlirohemi shumë shpejt nga ky krim.
KQZ shkeli çdo nen të kushtetutës, sot u provua se me Ramën në krye, në Shqipëri s’mund të ketë zgjedhje të lira e të ndershme. Dua të falënderoj shqiptarët që braktisën votimet njëpartiake.
