Një 34-vjeçar shqiptar është arrestuar në Hania të Greqisë pasi u kap me një sasi të madhe kokaine, gjatë një hetimi të organizuar nga autoritetet policore.
Sipas informacioneve, efektivët e policisë, të informuar për aktivitetet e dyshimta të tij, kryen një kontroll të imtësishëm në makinën dhe banesën e 34-vjeçarit.
Gjatë kontrollit të automjetit, autoritetet zbuluan një hapësirë të improvizuar poshtë timonit, ku u gjet një qese me kokainë.
Në total, policia sekuestroi 2 kilogramë e 465 gramë kokainë, të ndarë në 197 pako të vogla, një peshore precize, 3 000 euro të dyshuara si të ardhura nga trafiku i drogës, një telefon celular për komunikim dhe 3 USB për ruajtjen e të dhënave. Gjithashtu, u sekuestrua edhe automjeti që shërbente si mjet transporti për lëndën narkotike.
Hetimet paraprake po vijojnë nga Departamenti i Narkotikëve pranë nëndrejtorisë së Prokurorisë dhe Hetimit të Krimeve në Hania.
