Basha pas takimit në Presidencë: Miqësia me SHBA-të, thelbësore për Shqipërinë

Kryetari i Partisë Demokratike Lulzim Basha, e ka cilësuar të shkëlqyeshëm takimin e zhvilluar sot në Presidencë për “Defebder 21”.

Basha ka veçuar bisedën me ambasadoren e SHBA-ve, Yuri Kim, pavarësisht se ajo që ra në sy gjatë takimit në Presidencë, ishte ulja e kryedemokratit përballë kryeministrit Edi Rama.

“Takim i shkëlqyeshëm sot me Yuri Kim gjatë sesionit të NSC. Jam më krenar se kurrë për rolin tim për ta anëtarësuar Shqipërinë në NATO. Aleanca strategjike dhe miqësia e ngushtë midis Shqipërisë dhe SHBA-ve, është thelbësore për sigurinë dhe të ardhmen e Shqipërisë dhe unë synoj ta çoj atë në nivele të reja.”, shkruan Basha në rrjetin social, Twitter.

Presidenti Ilir Meta, nën cilësinë e Kryetarit të Këshillit të Sigurisë Kombëtare thirri sot në një takim të zhvilluar në Presidencë kryeministrin Edi Rama, kryetarin e opozitës, Lulzim Basha , ministrat Niko Peleshi e Bledi Çuçi, si edhe ambasadoren e Shteteve të Bashkuara të Amerikës, Yuri Kim.

Në prag të fillimit të një prej stërvitjeve më të mëdha të ushtrisë amerikane në Evropë, “Defender 21” dhe në kuadër të ardhjes së 6000 trupave ushtarake nga vendet e NATO-s dhe shtete të tjera aleate që do të stërviten në Shqipëri, drejtuesit e institucioneve kryesore të sigurisë kombëtare, u bënë bashkë në Presidencë.

Në takimin që ka zgjatur vetëm 30 minuta, siç bënë me dije edhe palët prezente u diskutua mbi masat përgatitore në lidhje me fazën përmbyllëse të stërvitjes së 6000 trupave ushtarakë në vendin tonë, që do të zhvillohet gjatë muajit maj të këtij viti.

Lexo edhe :   Shqipëria fiton artin/ Basha: Teatri Kombëtar do ndërtohet aty ku ishte